Talebanët kanë përjashtuar vajzat nga shkollat e mesme afgane, pasi urdhëruan vetëm djem dhe mësues meshkuj të ktheheshin në klasë.
Një deklaratë nga grupi islamik që zbulonte se klasat e mesme do të rifillonin, nuk përmendte vajza apo gra. Një nxënëse afgane tha për ‘BBC’ se ishte e shkatërruar. “Gjithçka duket shumë e errët”, tha ajo.
Pavarësisht premtimeve të talebanëve, kjo është shenja e fundit që Afganistani po kthehet në sundimin e ashpër të viteve 1990. Të premten, talebanët duket se kanë mbyllur ministrinë e çështjeve të grave, dhe e kanë zëvendësuar atë me një departament që dikur zbatonte doktrina të rrepta fetare.
“Unë jam shumë e shqetësuar për të ardhmen time”
Një deklaratë e lëshuar para hapjes së shkollave afgane të shtunën thuhet: “Të gjithë mësuesit meshkuj dhe studentët duhet të ndjekin institucionet e tyre arsimore”.
Shkollat e mesme janë zakonisht për nxënës të moshës 13-18 vjeç. Shumica e shkollave janë gjithashtu të ndara, gjë që do ta bënte të lehtë për talebanët të mbyllnin shkollat për vajzat.
Vajzat e shkollës dhe prindërit e tyre thanë se perspektivat ishin të zymta. “Unë jam shumë e shqetësuar për të ardhmen time”, tha një nxënëse afgane, e cila dëshironte të bëhej avokate.
“Gjithçka duket shumë e errët. Çdo ditë zgjohem dhe pyes veten pse jam gjallë? A duhet të qëndroj në shtëpi dhe të pres që dikush të trokasë në derë, dhe të më kërkojë të martohem? Ky është qëllimi i të qenit grua?”.
Babai i saj tha: “Nëna ime ishte analfabete dhe babai im vazhdimisht e ngacmonte dhe e quante idiote. Nuk doja që vajza ime të bëhej si mamaja ime”.
Burimi i lajmit: BBC. Përshtatur nga Tirana Today
