Partia Socialiste kërkon me ngulm shkarkimin e presidentit Meta, pas vendimit të këtij të fundit për anulimin e zgjedhjeve lokale.
Pas rezolutës të PS-së, e miratuar me 100 vota pro, ku kërkohej reflektimi i presidentit, tonet janë rritur akoma më shumë, teksa Meta në daljet publike ka theksuar se “zgjedhje më 30 qershor nuk ka dhe ky vendim nuk ndryshon”.
Sot, kreu i grupit parlamentar të PS, Taulant Balla në një konferencë urgjente për mediat u shpreh se Meta i ka dhënë vetes atribute të paligjshme që nuk i takojnë me anulimin e datës së zgjedhjeve.
Balla listoi sipas tij shkeljet e kreut të shtetit, ndërsa tha se me këtë akt presidenti po sillet si autoritet mbi kushtetutën e mbi sovranin.
“Anulimi i 30 qershorit dhe mos caktimi i një date tjetër mohon të drejtën e sovranit. Ushtrimi i të drejtës së sovranit, është ushtrim i drejtpërdrejtë i pushtet duke kontrolluar të zgjedhurit e vet. Anulimi zhbën autoritetin sovranit. Akti merr atribute sovrane duke barazuar presidentin me sovranin. Përmes këtij akti është cenuar dalja tej kompetencave me kushtetutë. Me këtë akt presidenti praktikisht është duke sjell në pozitën e pushtetit absolut të dhënë nga vetë sovrani.
Presidenti i ka marrë tagrat e sovranit:
- Presidenti me dekret ka zgjatur mandatin e pushtetit vendor. Mandati i të qeverisurve vendorë është 4 vjeçar me dekretin e Presidentit ku mandat zgjat dhe presidenti i ka njohur vetes atributet e ligjvënësit.
- Presidenti ka përcaktuar një datë tej datës së përcaktuar me ligj. Presidenti ka vendosur një datë tej atyre të njohura nga ligji. Caktimi i datës lidhet me mbarimin e mandatit të të zgjedhurve aktualë. Ka marrë atribute të kuvendit e sovranit. Autoriteti i vetëm është vetëm trupa legjislative. Dhe në këtë rast presidenti ka marrë atribute të paligjshëm. Është një rast i pa ndodhur ndonjëherë. Presidenti referon situatën 2007. Theksojmë se kjo situatë është e kundërta e këtij procesi. Vlerësojmë se presidenti po sillet si autoritet mbi kushtetutën e mbi sovranin.
- Presidenti ka anuluar datën e zgjedhjeve, Kushtetuta nuk ia njeh këtë drejtë. Ka për detyrë të caktojë datën e s ka alternativë për të shfuqizuar datën e zgjedhjeve.
- Presidenti ka cenuar rëndë parimin e periodicitetit të zgjedhjeve. Nëse do të zbatohet dekreti i presidenti, automatikisht kemi të bëjmë me cenim të këtij parimi”, tha Balla.
