Pas dekretit të presidentit Meta për shtyrjen e datës së zgjedhjeve, Partia Socialiste iu përgjigj menjëherë këtij vendimi të presidentit. Ministrja Elisa Spiropali u shpreh se me vendimin që kishte marrë Ilir Meta, ai nuk meritonte të ishte më në postin e presidentit.
Ndërkohë, sot nga kryesia e Kuvendit doli në një konferencë urgjente kryetar i grupit parlamentar të PS, Taulant Balla, i cili iu rikthye edhe njëherë dekretimit të datës së zgjedhjeve.
Balla ka dorëzuar në Kuvend kërkesën zyrtare të mazhorancës për shkarkimin e Presidentit Ilir Meta, pasi firmosi dekretin për anulimin e zgjedhjeve të 30 qershorit.
“Sot u depozitua në Parlament, kërkesa me firmat e 55 deputetëve për shkarkimin e Metës, nga 35 të nevojshme”, deklaroi Balla.
Sipas tij, presidenti me vendimin e tij ka bërë disa shkelje duke cenuar kështu rëndë parimin e ushtrimit të sovranitetit nga populli.
“Së pari është cenuar rëndë parimi i ushtrimit të sovranitetit nga populli. Sovraniteti i takon popullit e ushtron në mënyrë të drejtpërdrejtë ose nëpërmjet të zgjedhurve të tij. Në këtë kuptim i ka hequr sovranit të jetë i tillë”, u shpreh Balla.
Balla tha se Presidenti po merr kompetenca më shumë nga sa i takojnë dhe në kundërshtim me ligjin, ndërsa shton se edhe në rastin ku ndryshon data e zgjedhjeve duhet caktuar një datë tjetër.
“Sikur dhe një ditë më shumë përtej mandatit të rrinë të zgjedhurit, automatikisht kthehen në pushtete autoritare. Dekreti i Presidentit përbën një cenim të rëndë duke bërë të pamundur qeverisjen e vendit, sipas Kushtetutës”, komunikoi Balla.
