PS mbledh 25 partitë aleate, ja çfarë u vendos

Kryeministri Edi Rama ka organizuar ditën e sotme një tryezë diskutimi me 25 partitë aleate.

Në këtë mbledhje është diskutuar mbi situatën aktuale politike dhe zgjedhjet në vend, ku PS ka kërkuar konsultime nga aleatët e saj për të kapërcyer ngërçin që ka përfshirë politikën.

Gjithashtu, është vendosur dhe riaktivizimi i koalicionit të majtë.

Deklarata e përbashkët është publikuar nga Sekretari i Përgjithshëm i PS, Taulant Balla dhe është firmosur nga 23 partitë aleatë të PS-së.

Në deklaratë theksohet se PD dhe LSI po kërkojnë të destabilizojnë situatën dhe të rikthejnë vendin në kaosin e ‘97-’98, si dhe shprehen se partitë politike të spektrit të majtë do të hartojnë një platformë me anë të të cilës do të garantojnë fitoren në zgjedhjet e 30 qershorit.

Deklarata e plotë:

Partitë politike të mbledhura në një tryezë konsultimi, thirrur nga Partia Socialiste:

– duke analizuar situatën politike në vend,

– duke gjykuar braktisjen e Kuvendit të Shqipërisë nga një pjesë e deputetëve të PD dhe LSI,

– duke konsideruar reagimin dhe mbështetjen e komunitetit ndërkombëtar,

– duke inkurajuar pa rezerva hapjen e negociatave për anëtarësim të Shqipërisë në BE,

– duke mbështetur me të gjitha energjitë funksionalitetin e shtetit dhe normalitetin shoqëror,

– duke këmbëngulur për zbatimin e Reformës në Drejtësi, sundimin e ligjit dhe luftën kundër korrupsionit,

– duke theksuar rëndësinë politike të zgjedhjeve vendore të 30 Qershorit të këtij viti,

DEKLAROJMË SE :

Braktisja nga një grup deputetësh të PD dhe LSI të Kuvendit, të tempullit të demokracisë institucionale, synon të dëmtojë rëndë interesat tona kombëtare dhe strategjike në favor të interesave të ngushta të karrierës personale dhe llogarive partiake.
Retorika dhe përdorimi i dhunës prej PD dhe LSI për qëllime politike tenton destabilizimin e vendit dhe kaosin shoqëror, duke na kthyer shumë vjet mbrapa, në të kaluarën me ngjarje të rënda të viteve ‘97 e ’98.
Mbështesim ndryshimet e propozuara të Kodit Zgjedhor dhe thellimin e këtyre ndryshimeve për të garantuar depolitizim të plotë të të gjithë Administratës Zgjedhore, pjesëmarrjen e emigrantëve në proceset zgjedhore dhe përdorimin e teknologjisë për numërimin elektronik të votave në një projekt pilot qysh në zgjedhjet vendore të 30 Qershorit.
Angazhohemi për të ndërtuar një platformë të përbashkët për një koalicion funksional dhe fitues të zgjedhjeve për organet e qeverisjes vendore.
I bëjmë thirrje partive politike të të gjithë spektrit pluralist në vend të respektojnë afatet e regjistrimit në KQZ sipas Kodit Zgjedhor.

Partia Socialiste

Partia Social Demokrate

Partia Demokracia Sociale

Aleanca Popullore

Partia Socialiste e Moderuar

Aleanca Demokratike

Partia e Gjelbër

Partia e Unitetit Kombëtar

Partia G99

Aleanca për Demokraci dhe Solidaritet

Partia Ardhmëria Shqiptare

Partia Për Mbrojtjen e të Drejtave të Emigrantëve