Kreu i Grupit Parlamentar të Partisë Socialiste, ka dorëzuar sot në Kuvend, dy amendamentet për ish-bashkëpunëtorët e Sigurimit. Taulant Balla, në një deklaratë për mediat para depozitimit të projektligjit për hapjen e dosjeve të ish-Sigurimit të Shtetit, ka thënë se ligji do të ketë dy nisma të reja.
E para përfshin ndalimin e marrjes së posteve publike nëse vërtetohet lidhja me ish-sigurimin e Shtetit. Nisma e dytë përfshin ndalimin e bashkëpunëtorëve të ish-Sigurimit të Shtetit, ndërsa këtij detyrimi do t’i nënshtrohen të gjithë personat që synojnë apo janë në pozicione të tilla me apo pa certifikatë pastërite.
“Sot PS prezanton edhe dy nisma të tjera për ndalimin e personave me lidhje në të shkuarën me ish-Sigurimin famëkeq. Janë dy nisma, e para ka të bëjë me ndryshimin e ligjit për integritetin e personave që zgjidhen dhe emërohen në funksione politke, ose ligi i dekriminalizimit dhe tjetra për partitë politike. E para parashikon ndalimin e personave për të marrë poste publike nëse vërtetohet lidhje me Sigurimin e Shtetit. Verifikimi kryhet në bazë të vetëdeklarimit dhe nëse rezulton i pavërtetë përveç humbjes për të qenë në poste publike, personi ngarkohet me përgjegjësi penale.
Nisma e dytë ajo për ndryshimin e në ligjin e partive ka të njëjtën qasje, pra nuk mund të jenë kryetar të partive në sistemin demokratik, ata që kanë qenë bashkëpunëtore të sigurimit. Këto dy nisma janë premisat e duhura ligjore që spiunët e regjimit të mos jenë më pjesë e asnjë posti publik”.
