Ish-deputeti demokrat Myslim Murrizi ka kritikuar ashpër zgjedhjet që u zhvilluan ditën e djeshme në strukturat e PD-së. Ai shprehet se u premtua një rithemelim, por në të vërtetë dje sipas tij u krye një ‘rikthim i dorës së tretë të PD-së së Lulzim Bashës në dorën e parë të PD së rithemeluar’.
Për të e vetmja garë e zhvilluar ditën e djeshme në PD ishte ajo mes Luçiano Boçit dhe Belind Këlliçit për nënkryetar.
REAGIMI
Bela e madhe me PD
Kur nuk merr vota dhe humbet zgjedhjet, të heq neni i Lulit; kur je i votuar në popull dhe merr vota, të heq neni i Mulit. Dje ndodhi, siç e kisha thënë para 3 ditësh, që kandidatët “rivalë” përballë atyre që ishin piketuar për t’u “zgjedhur” dolën “vullnetarë”, kllounë politikë që u ofruan për t’u përdorur vetëm që t’i bëjnë qejfin komandantit.
Dyshoj shumë se një pjesë e garuesve formalë mund të mos e kenë votuar as emrin e tyre. E vetmja garë dje, por edhe ajo e qëllimshme për të hequr si nënkryetar Luçianon, ishte ajo midis Luçiano Boçit dhe Belind Këlliçit për një nga 3 nënkryetarët e PD-së. Them nga 3 nënkryetarët, se për Garzin dhe Gjekmarkajn, që i ka emëruar Berisha si mender nënkryetarë qysh në vitin 2023 pa u votuar dhe vazhdon t’i quajë nënkryetarë pa u votuar, as ma ndjen e as i pjerdh kushdo që ka sadopak dinjitet e respekt për veten, nisur nga ajo që thotë statuti i PD-së.
I ka qejf Berisha apo i mban nga halli, ose e kanë detyruar ata që mund t’i duan, le t’i mbajë Berisha edhe në prehër, po deshi, se mbase do të kënaqen më shumë sesa me postet që mbajnë prej 3 vitesh, njëri kryetar grupi dhe tjetri nënkryetar i Kuvendit.
Pas largimit të Luçiano Boçit, tani nga RITHEMELIMI ka ngelur vetëm Berisha dhe Muli. Të gjithë të tjerët u larguan dhe u zëvendësuan me ata që ishin me Bashën, që përjashtuan Berishën, që thanë se po erdhi Berisha do ikim nga politika, që ishin pro Amerikës të thekur dhe që rrahën më 8 janar 2022 demokratët në selinë e PD-së. Dje u përfundua me sukses misioni i shndërrimit të RITHEMELIMIT në RIKTHIM të dorës së tretë të PD-së së Bashës në dorën e parë të PD-së së rithemeluar.
Ajo që kërkojnë ta shesin si ripërtëritje nuk është asgjë më shumë sesa ripërtypje e asaj çfarë kanë thënë për njëri-tjetrin nga shtatori 2021 deri në dhjetor 2023. Tani të presim shtatorin për të nisur “revolucionin”, por jo të Flamingove, por të Flamengove.
Më 11 maj 2025, PD kishte 160 kandidatë në listën e hapur në të gjithë Shqipërinë dhe secili mori vota nga qytetarët sipas vlerësimit të qytetarëve, jo preferencës së kryetarit.
Dhe kur PD nuk vlerëson ata që i vlerësuan qytetarët me votë, por kërkon të promovojë ata që janë votuar më pak vetëm se kërkojnë t’i kenë si ushtarë 3-4 dallkaukë e servilë të pështirë që i lëpihen Berishës dhe kanë kapur prej fyti PD-në, atëherë çdo hipokrizi e demagogji se kemi bërë ripërtëritje apo kemi ekipin më të mirë që kemi pasur ndonjëherë, më kujton sloganet komuniste se jemi shkëmb graniti.
Berisha i gjeneratës A bën “mirë” që mburret se ka bërë ekip me gjeneratën Z, por problemi qëndron se Berishës ia kanë rekomanduar gjeneratën Z gjeneratat K, B dhe Q që e rrethojnë, se me bindje e them që më shumë se gjysmën e të zgjedhurve as i njeh e as e di se çfarë janë.
Gjithsesi, koha do të tregojë se sa vlerë politike do të ketë te qytetarët ekipi i ri i ripërtëritjes, me plot individë anonimë politikë dhe pothuajse kontribut zero në PD.
Deri në zgjedhje është “stërvitje”.
Ndeshja është te VOTA.
TË TJERAT JANË DENGLA QË NUK I HA ASKUSH MË PAS 16 VITESH NË OPOZITË”, shkruan Murrizi.
