Vijon prej më shumë se një ore tashmë protesta kundër shembjes së godinës së Teatrit Kombëtar.
Protestues të shumtë janë mbledhur në Bulevard dhe në afërsi të truallit ku ndodhej godina e Teatrit. Protestuesit i janë drejtuar në kor presidentit Meta që të shpërndajë parlamentin.
Ky i fundit ka dënuar veprimin e shembjes së Teatrit, duke depozituar edhe një padi në Gjykatën Kushtetuese. Kreu i shtetit ka reaguar ashpër gjithashtu lidhur me dhunën e ushtruar në protestë nga ana e Policisë së Shtetit.
Godina e Teatrit Kombëtar u shemb në orët e para të mëngjesit të datës 17 maj. Aleanca për Mbrojtjen e Teatrit ka nisur një peticion tashmë për të rindërtuar Teatrin Kombëtar në të njëjtin vend dhe ashtu siç ishte më parë.
