Që prej vdekjes së afro-amerikanit George Floyd gjatë arrestimit, SHBA është përfshirë nga protesta të shumta dhe masive.
Mediat amerikane raportojnë se protestuesit kanë qëlluar dhe plagosur 5 oficerë policie. Ndërkohë presidenti Trump ka paralajmëruar se nëse demonstratat vijojnë të shtohen, atëherë mund të nxjerrë ushtrinë në rrugë.
Demonstruesit i kanë vënë zjarrin një qendre tregtare në Los Angeles, ndërsa kanë plaçkitur edhe disa dyqane në New York. Gjithashtu ata janë përleshur me policinë në St Louis, Misuri, ku katër oficerë u dërguan në spital me lëndime jo të rrezikshme për jetën.
Një komisar i policisë së St. Louis, John Hayden tha se rreth 200 protestues demonstronin fuqishëm përpara tyre, duke shkaktuar edhe trazira.
Trump ka dënuar ashpër vdekjen e Floyd, duke premtuar drejtësi për çështjen. Por sipas tij, protestat nuk mund të shkojnë kaq larg, sa të kalojnë çdo limit në dhunë.
Ditën e djeshme u publikuan edhe rezultatet e autopsisë private që familjarët e të ndjerit kishin kërkuar. Përgjigjet e autopsisë tregonin se ai kishte humbur jetën si pasojë e shtypjes së ushtruar në qafë dhe shpinë nga oficerët e policisë në Minneapolis.
