Sekretari i Përgjithshëm i Partisë Demokratike, Gazmend Bardhi, ka thënë se në protestën e opozitës që do mbahet të shtunën, nuk do të ketë një orar konkret se sa do të zgjasë. Në një lidhje live me emisionin “Opinion” në Tv Klan, Bardhi tha se protesta do të mbahet në bulevard, përpara Kryeministrisë.
“Nuk kemi një skenar të parapërgatitur. Është një protestë kundër qeverisë. Do të jetë një protestë që do zhvillohet në bulevardin “Dëshmorët e Kombit”, përpara godinës së Kryeministrisë.
Kjo është protesta e pestë. Ne kemi marrë një vendim politik për të braktisur Parlamentin, dhe kemi vendosur të krijojmë një axhendë, ne jemi në takime të përditshme me qytetarët.
Të gjithë drejtuesit politikë të PD janë nga mëngjesi deri në darkë në takime me qytetarët. Axhendën tonë politike e kemi përputhur me axhendën që kanë qytetarët. Qyterarët kanë halle, dhe ne jemi atje”.
Mjaft me interes është nëse do të ketë përshkallëzim të protestës, për të cilën Gazmed Bardhi tha se me rëndësi mbetet siguria e çdo qytetari.
“Detyra jonë është të garantojmë sigurinë e çdo qytetari që merr pjesë në protestë. Ka patur një skenar që nxit dhunën nga ana e policisë, që krijojnë një lloj irritimi te qytetarët. Nuk ka pasur në asnjë protestë të organizuar nga Partia Demokratike, asnjë tentativë për të ushtruar dhunë ndaj institucioneve”.
