Opozita ka thirrur sot në orën 20:00 një protestë kombëtare, e para pas zgjedhjeve vendore të 30 qershorit. Organet ligjzbatuese, prej ditës së djeshme kanë marrë masa pranë institucioneve si Kryeministria, Ministria e Brendshme dhe Parlamenti. Në protestën e sotme policia pritet të angazhojë 1300-1500 punonjës policie, ndërsa do angazhohen forcat e rendit, të ndërhyrjes së shpejtë, repartit Shqiponja dhe punonjës të gardës.
Pranë Kryeministrisë janë vendosur prozhektorë të rinj, që mundësojnë ndriçimin e vendqëndrimit të efektivëve të policisë. Në kuadër të masave, janë pastruar kamerat e sigurisë, për të bërë të mundur dokumentimin e protestës së opozitës.
Pranë Ministrisë së Brendshme, disa orë para protestës gjithashtu është vendosur gardhi metalik, pranë të cilit 2 orë para nisjes së tubimit do të vendosën efektivët e policisë. Të njëjtat masa janë marrë dhe para Parlamentit, kjo për shkak të seancës plenare dhe të protestës së opozitës.
