Ka nisur pak më parë protesta e thirrur nga Aleanca për Mbrojtjen e Teatrit. Qindra qytetarë i janë bashkuar protestës në Bulevard me tingujt e “Himnit të teatrit”.
Krahasuar me protestën e mbajtur dy ditë më parë, duket të ketë një ulje të numrit të efektivëve të policisë të angazhuar në mbajtjen e rendit.
Bëhet me dije se në protestën e sotme janë angazhuar rreth 300 punonjës policie, si dhe forcat e rendit, Shqiponjat dhe dy njësi të FNSH.
Raportohet se disa efektivë të RENEA-s do të monitorojnë nga lart protestën dhe personat e rrezikshëm.
Sipas BalkanWeb, një grup i FNSH-së dhe autobotet me ujë do jenë të pozicionuara te Kryeministria të gatshëm për të ndërhyrë.
Kësaj kauze i janë bashkuar edhe të rinjtë e teatrit “Migjeni” në Shkodër, të cilët kanë zhvilluar një tubim të heshtur. Ata mbanin në duar mbishkrime ku thuhet “Teatri është shtëpia ime”, “Unë jam teatri”, “Shembët godinën por jo teatrin”, “Jetojmë për lirinë” etj.
