Ka filluar protesta e katërt kombëtare e organizuar nga opozita para godinës së Kryeministrisë, e cila pritet të zgjasë deri në mesnatë. Kryetarja e LSI-së ka folur gjatë momentit kur ka dalë në rrugë për t’iu bashkuar protestuesve.
Ajo është shprehur se Rama si gjithmonë nuk do të jetë në zyrë dhe se me aq qytetarë sa janë mbledhur në shesh, ai e di që zyra e tij pushtohet për një sekondë.
“Falënderojmë shqiptarët myslimanë që iu bashkuan protestës së opozitës edhe pse janë në muajin e Ramazanit, mediat që nuk iu ndanë në asnjë moment protestave të opozitës, pavarësisht shantazhit që ushtrohet ndaj jush. U jam mirënjohës të gjithë qytetarëve të Tiranës që i janë përgjigjur protestës së opozitës.
Kam një mesazh për Ramën, që nuk do jetë në zyrë si gjithmonë, me aq njerëz në shesh për një sekondë zyra e tij pushtohet. Do jetë më keq nëse zyra e tij pushtohet nga qytetarët, prandaj do jetë më mirë që tu japë atyre zgjedhje të lira dhe të vendosin.
Ky nuk është akti final, ai vjen në momentin që shqiptarët do të kenë mundësinë të kenë zgjedhje të lira dhe të ndershme. Kjo do të zgjasë edhe pak ditë, por që për shqiptarët duket shumë, pasi jetojnë në kushte të vështira.”
