Disa simpatizantë të PD-së, kanë nisur të hedhin shashka në zonën përreth perimetrit të sigurisë. Sakaq, një pjesë e tyre që ndodhen përpara kordonit të policisë, kanë hedhur tymuese në drejtim të efektivëve të vendosur për ruajtjen e sigurisë.
Edhe pse nuk ka pasur konfrontime me forcat e policisë, është parë një ambulancë teksa merr me barrelë një prej protestuesve. Ende nuk është bërë e qartë se çfarë ka ndodhur dhe kush është protestuesi që është ndjerë keq.
Ndërkohë që protesta vazhdon dhe në Kuvend janë betuar katër deputetët që ishin në radhë në lista, duke u bërë zyrtarisht pjesë e opozitës në parlament. Katërshja e deputetëve zunë vend në rreshtin e tretë të opozitës, teksa iu desh të dëgjojnë fjalimin e kryeministrit Edi Rama përpara se të bënin betimin.
Ne fund, kreu i Kuvendit, Gramoz Ruçi i ka përgëzuar dhe uruar deputetët e rinj.
Ndërkohë që betimi i tyre është shoqëruar me duartrokitje nga ana e deputetëve të PS-së, te pranishëm në seancë.
