Kryeministri Edi Rama ka pritur sot në një takim përfaqësuesin e lartë për politikën e jashtme të BE, Josep Borrell, me të cilin diskutoi për hapjen e negociatave për anëtarësim të Shqipërisë në BE dhe luftën në Ukrainë.
Borrell është ndalur në protestën në Tiranë, ku tha se e kupton shqetësimin e banorëve. Per të, rritja e çmimeve ka ndodhur në të gjithë botën si pasojë e luftës dhe jo sanksioneve.
“E di që ju keni hasur shqetësime mjaft të mëdha për rritjen e çmimeve dhe lufta ka krijuar një ndërprerje shumë të madhe në ekonominë botërore. Nuk janë pasojat e sanksioneve por është një proces që ka nisur me rritjen e çmimeve më parë të energjisë, naftës, gazit dhe është pasojë e varësisë që ka e gjithë bota dhe po bëhet edhe më e qartë pasi Rusia po e përdor atë si armë.
Kjo nuk është një çështje që ka të bëjë me sanksionet, por pasojë e luftës dhe ndalimit të eksporteve, që na prekin të gjithëve. Më lejoni ta ilustroj me një shembull; unë paguaja në Spanjë 50 euro energji dhe sot paguaj 500 euro. Nafta në Bruksel është mbi 2 euro litri. Këto pasoja do të krijojnë valë shoku të mëdha, tronditje në ekonominë tonë”, tha Borrell.
Bordi i Transparancës i ngritur me vendim Qeverie, me qëllim kufizimin e përkohshëm të çmimeve të tregtimit me shumicë/pakicë të nënprodukteve të naftës dhe gazit, në mbledhjen e tij të radhës ka vendosur çmimet e reja për një periudhë të shkurtër dy ditore.
Bordi i Transparencës, i ngritur me Akt Normativ pak ditë më parë, përcaktoi çmimet për karburantet për ditën e sotme dhe të nesërme. Sipas këtij vendimi, çmimi i naftës dhe benzinës do të jetë 211 lekë/ litri sot dhe nesër. Çmimi i gazit nuk ndryshon, mbetet 93 lekë/ litri.
