Pasi protestuesit në Shkodër bastisën e dogjën gjithçka gjetën, ka ardhur dhe ndërhyrja e Forcave të Ndërhyrjes së Shpejtë, të cilat kanë hedhur dhe gaz lotsjellës për të shpërndarë protestuesit.
Policia ka krijuar gardh pranë selisë së PS-së që tashmë është mbuluar nga tymi e zjarri i vendosur sendeve në rrugën përpara. Protestuesit janë larguar, duke u spostuar disa dhjetëra metra dhe kanë hyrë nëpër rrugica, ndërsa ka dhe efektivë policie të shpërndarë.
Prej 3 ditësh në Tiranë dhe qytete të ndryshme të vendit janë organizuar një sërë protestash për vrasjen e 25-vjeçarit, Klodian Rasha nga një efektiv policie.
Ministri i Brendshëm, Sandër Lleshaj njoftoi dorëheqjen nga posti 2 ditë më parë, por protestuesit nuk janë mjaftuar me kaq.
Ata kërkojnë edhe dorëheqjen e Drejtorit të Përgjithshëm të Policisë, Ardi Veliu, megjithatë kryeministri Edi Rama ka deklaruar se diçka e tillë nuk do të ndodhë, duke i etiketuar protestuesit, si lukubi halabakësh.
