Ministrja e Arsimit, Evis Kushi, ka deklaruar në një intervistë se nxënësit të cilët morën pjesë në protestën zhvilluar për vrasjen e Klodian Rashës, do të identifikohen dhe sipas saj, do të trajnohen psikologjikisht.
“Unë si ministre kam një shqetësim shumë të madh për këta fëmijë, kur të mbarojë gjithçka do të interesohemi që të kemi emrat, t’i identifikojmë se një pjesë janë të shkollave 9-vjeçare dhe gjimnazistë, që të marrin trajtim psikologjik. Kjo që ka ndodhur është e rëndë edhe për zhvillimin e tyre”, ka thënë ajo.
Marrë shkas nga kjo deklaratë, një kundërpërgjigje ka ardhur nga Lëvizja për Universitetin, ku edhe kanë shprehur kërkesën e tyre për dorëheqjen e Ministres së Arsimit. Në reagimin në fjalë, Lëvizja për Universitetin thotë se deklarata të tilla përçmuese si ajo e ministres së Arsimit, janë të denja vetëm për regjimet diktatoriale.
Më tej thuhet se Ministrja Kushi duhet të shqetësohej për fëmijët dhe mësuesit që përdoren për fushata elektorale, dhe propagandë mediatike. Po kështu ajo duhej të shqetësohej për raportet e Bankës Botërore, ku 50% e 15-vjeçarëve në Shqipëri janë analfabetë funksionalë, për shkak të hendekut të madh të pabarazive sociale.
Statusi
EVIS KUSHI DORËHIQU!
Dje ministrja e Arsimit, Sportit dhe Rinisë Evis Kushi ka tentuar të nëpërkëmbë frymën e protestës së të rinjve duke i konsideruar subjekte të psikologut. Ministrja nuk e di se psikologu nuk mund të caktohet nëse nuk kërkohet dhe miratohet nga vetë personi.
Ministrja Kushi duhet të shqetësohej për fëmijët dhe mësuesit që përdoren për fushata elektorale dhe propagandë mediatike. Ajo duhet të shqetësohej për raportet e Bankës Botërore, ku 50% e 15-vjeçarëve në Shqipëri janë analfabetë funksionalë për shkak të hendekut të madh të pabarazive sociale. Hendek ky i cili thellohet akoma më shumë me ligjin e arsimit të lartë, ku studentët kthehen në klientë që peshohen nga xhepat.
Shqipëria është në vendin e fundit në rajon për financimin e arsimit, me vetëm 3.3% të PBB-së, ndërkohë që vendet e tjera e kanë 4-4.5%.
E ftuar në studiot televizive për të bërë propagandë kundra protestës, ministrja Kushi shprehej gjithashtu se protesta ishte krim. Ajo harron qëllimisht që shumë minorenë janë dhunuar, arrestuar dhe përndjekur nga Policia e Shtetit. Sipas raportit të Avokatit të Popullit nga 182 të ndaluar, 60 prej tyre janë të mitur. Gjithashtu rezulton se ndaj të miturve nuk janë respektuar parashikimet dhe standartet e legjislacionit lidhur me praninë e psikologut, si dhe vendin e marrjes në pyetje të të miturve.
Sot Lëvizja Për Universitetin kërkon dorëheqjen e ministres Evis Kushi. Pas akuzave për plagjiaturë të punimit shkencor të doktoraturës, dështimit të mësimit online dhe keqmenaxhimit të shkollave në këtë gjendje pandemie, deklarata të tilla përçmuese si ajo e djeshmja janë të denja vetëm për regjimet diktatoriale.
