Ministrja e Arsimit, Evis Kushi, e konsideron si një sakrificë të të gjithëve përpjekjet për mësimin online, ndonëse studentët janë shprehur kundër këtij vendimi. Vendimin e Komitetit Teknik e cilëson si aspak të lehtë, duke thënë se mësimi online nuk duhet të shihet si pengesë, por si një mënyrë për të përballuar sfida të tjera. Sipas saj, kjo është e vetmja mënyrë për t’ia dalë, për përballimin dhe parandalimin që mund të na vijnë nga të panjohura më të mëdha si COVID-19.
”Ky fillim viti akademik është tejet i pazakontë, sfidues si asnjë vit tjetër më parë. Për shkak të rrethanave të paqarta të pandemisë në gjithë globin. Dhe nuk është aspak e këndshme të uroj vitin e ri akademik me auditorë të zbrazëta.
Janë rrethana që s’mund t’i shmangim, por t’i përballojmë, me sa më shumë qetësi, vendosmëri e kurajo. Jam e vetëdijshme për vështirësitë. Sfidat aktuale i shoh jo vetëm si pengesa, por dhe ura që na orientojnë drejt urave të reja.
Mendoj që kjo është e vetmja mënyrë për t’ia dalë, për përballimin dhe parandalimin që mund të na vijnë nga të panjohura më të mëdha si COVID-19″, theksoi Kushi.
Ministrja më tej shtoi se “vendimi i Komitetit të Ekspertëve, nuk është aspak i lehtë. Prandaj si Ministre e Arsimit, dua forcë dhe fleksibilitet. Është shumë e vështirë të menaxhojmë situatën, duke ndjekur dhe metodat specifike”.
Ajo risolli në fokus rregullat e pandemisë, ndërsa shtoi se së bashku do i kapërcejnë sfidat.
“Jam informuar se janë marrë të gjitha masat për nisje dhe vazhdim të mbarë të vitit akademik. Vështirësitë s’mund të ndalin të vijojmë me paktin për universitetin, si prioriteti për shërbime më të mira ndaj studentëve. Pa u zgjatur më shumë, dua t’ju kujtoj se për asnjë moment mos neglizhojmë rregullat. Me shpresë në momentin më të parë t’i kthehemi normalitetit, jo vetëm në universitete, por në jetë. E di që së bashku do bëjmë më të mirën, do kapërcejmë sfidat, do ia dalim”, theksoi Kushi.
