Përdhunimi i 11-vjeçares vijon që të hetohet nga ana e policisë së Kosovës. Në një konferencë për mediat, Prokuroria Themelore në Prishtinë ka përcjellë të tjera detaje lidhur me këtë rast. Zëdhënësja e kësaj Prokurorie, Laureta Ulaj, ka treguar kronologjinë e ngjarjes për rastin e 11 vjeçares, e cila dyshohet se përveçse në muajin gusht ka qenë pre e dhunimit edhe në qershor.
11-vjeçarja u përdhunua për 7 orë resht nga 5 meshkuj. Ngjarja raportohet të ketë ndodhur më 27 gusht nga ora 17:30 deri në orën 00:30. Dhunimi i vajzës së mitur ka nisur në parkun në lagjen “Arbëria” në Prishtinë, për të vazhduar në një vend tjetër të panjohur.
“Kjo prokurori që nga fillimi i këtij rasti që ka pranuar në qershor të këtij viti ka ndërmarrë të gjitha veprimet. Fillimisht më 21 qershor e mitura ka da dalë nga shtëpia rreth orës 08:00 për të cilin rast nëna e ka raportuar në polici si person i zhdukur, me tu njoftuar prokurori i çështjes nga Departamenti për të Mitur, i njëjti ka autorizuar policinë në ndërmarrjen e veprimeve hetimore. Të nesërmen më 22 qershor në ora 08:20 në stacionin policor të veriut është gjetur e mitura dhe menjëherë është intervistuar në prezencë të punëtorit special dhe është dërguar në strehimore”, ka thënë Ulaj.
Ajo ka shtuar se Drejtoria e Hetimit të Trafikimit me Qenie Njerëzore është njoftuar dhe ka ndërmarrë veprimet hetimore, pasi kanë patur dyshime se e njëjta ka qenë e shfrytëzuar seksualisht nga persona të ndryshëm.
“Më 22 qershor hetuesit kanë njoftuar Prokurorin nga Departamenti për të mitur dhe kanë paraqitur kërkesë për ekzaminim fiziogjinekologjik, në fund të kësaj urdhërese është kërkuar që kjo kërkesë të merret me urgjencë. Po të njëjtën ditë prokurori kujdestar nga Departamenti për të Mitur ka kërkuar ekzaminim fiziogjinekologjik. Më 23 qershor Prokuroria Themelore në Prishtinë ka paraqitur urdhëresë për ekzaminimin e ADN-së në trupin e viktimës”, u shpreh zëdhënësja e Prokurorisë Themelore, Laureta Ulaj.
“Më 24 qershor Prokurori i Shtetit ka paraqitur kërkesë për sekuestrim të përkohshëm të telefonit të së dëmtuarës, dhe kjo kërkesë është aprovuar nga gjykata. Më 27 qershor është bërë kërkesë për tërheqjen e kamerave të moteleve ku supozohet se ka mundur të shkoj viktima dhe me datën 7 korrik prokurori i rastit e ka dëgjuar të dëmtuarën në prezencë të psikologes dhe të punëtores sociale”, tha Ulaj.
Ulaj shtoi se 11 vjeçarja kishte qëndruar për një muaj në strehimore, dhe se kishte dalë me kërkesë të familjes. Në 21 korrik, me kërkesë të familjes, e mitura ka ikur nga strehimorja, duke marrë përgjegjësi për vajzën e tyre.
“E mitura ka qëndruar rreth një muaji në strehimore. Më datë 21 korrik me kërkesë të familjes viktima është liruar nga strehimorja dhe të njëjtit kanë deklaruar se do të marrin përgjegjësi për vajzën e tyre”, tha ajo.
“Prokuroria ka arrestuar gjashtë persona që janë dërguar në ndalim prej 48 orës që janë dyshuar që kanë kryer veprën penale dhunim, trafikim i qenieve njerëzore, dhe shfrytëzim seksual të viktimës së trafikimit. Ata tashmë gjenden në paraburgim. Derisa me rastin që ndodhi në fund të muajit gusht, fillimisht u arrestuan dy persona më pastaj u arrestuan edhe dy persona të tjerë, dhe pastaj edhe personi i pestë. Të njëjtit gjenden poashtu në paraburgim”, tha Ulaj.
