Duket se pritjes së ish-ministrit të Brendshëm Saimir Tahiri, po i vjen fundi. Prokuroria për Krime të Rënda, pas përfundimit të hetimeve, ka dërguar për gjykim dosjen penale ndaj Tahirit, i cili akuzohet për përfshirje në trafikun e drogës me bandën “Habilaj”.
Tahiri është thirrur për t’u paraqitur nesër me 28 shkurt ora 13:00 për t’u njohur me akuzat zyrtare të Prokurorisë. Gjykata e Krimeve të Rënda pranoi më 11 shkurt kërkesën e ish-ministrit për moszgjatjen e hetimeve, duke iu lënë afat prokurorëve deri më datë 10 mars. Por me sa duket hetimet janë mbyllur më herët.
Më 17 Janar të këtij viti, organi i akuzës njoftoi se do të zgjasë edhe me tre muaj afatet e hetimit. Shkak për zgjatjen e hetimeve është bërë letër-porosia që autoritetet shqiptare i kanë dërguar Malit të Zi dhe Katanias. Përgjigja me sa duket ka ardhur dhe dosja është dërguar për gjykim.
