Ministrja e Shëndetësisë, Ogerta Manastirliu njofton se duke filluar nga dita e hënë, zona e gjelbërt do të përfshijë gjithsej 15 bashki në të gjithë vendin.
Në një komunikatë në Facebook, Manastirliu bëri me dije se pjesë e zonës së gjelbërt do të jenë edhe Kukësi, Korça, Lushnja dhe Lezha.
Sipas ministres, në vendet që përfshihen në këtë zonë do të lejohet qarkullimi ndërqytetas me automjet privat deri në orën 21:00. Gjithashtu ajo theksoi se në këto vende do të hapen parukeritë, berberët, klinikat dentare apo qendrat tregtare.
“Nga dita e hënë data 11 Maj, siç e kemi lajmëruar, shtohen si zonat të gjelbërta bashkitë: Lushnje, Patos, Roskovec, Korçë, Has, Kukës, Lezhë, Mirditë, Fushë-Arrëz, Malësi e Madhe, Pukë, Vau Dejës, Kavajë dhe Vorë me të njëjtat rregulla.
Në këto zona lejohet qarkullimi ndërqytetas brenda zonave të gjelbërta me automjet privat (duke lejuar udhëtimin e më shumë se dy personave të së njëjtës familje) deri në orën 21:00.
Ndërkohë që mbeten në fuqi rregullat që ndalojnë grumbullimin e më shumë se pesë personave, aktivitetet kulturore dhe sportive të çdo lloji dhe transporti publik si dhe njësitë ekonomike ende të mbyllura.
Po kështu, nga data 11 Maj lejohen të ushtrojnë veprimtari sipas protokolleve strikte të sigurisë, me të cilat bizneset janë njohur përgjatë kësaj kohe, aktivitetet si më poshtë, klinikat dentare, parukeri, berber dhe dyqanet në qendrat tregtare.
Theksojmë se është shumë i rëndësishëm zbatimi i distancimit fizik dhe kushteve të higjienës në këto aktivitete biznesi, ku ashtu siç po realizohet në vijimësi, task forca do të vijojë kontrollin për zbatimi e protokolleve të sigurisë”, tha ajo.
