Ministrja e Shëndetësisë, Ogerta Manastirliu ka folur në lidhje me lehtësimin e masave, e më konkretisht se çfarë pritet të ndodhë në datën 18 maj.
Përmes një komunikate për mediat, Manastirliu bëri me dije se duke nisur që nga kjo datë do të ketë një rihapje të muzeve, galerive të arteve dhe siteve arkeologjike nën masa të rrepta.
Gjithashtu ajo sqaroi se do të hapen baret dhe restorantet, vetëm në ambientet e jashtme deri në orën 17:30. Ministrja tha se do të shtohet numri i fluturimeve të riatdhesimit, duke theksuar se të riatdhesuarit do të duhet të qëndrojnë 14 ditë në vetëkarantinim.
Manastirliu theksoi se shërbimi i transportit publik do të vijojë të jetë i mbyllur.
“Në vijim të Planit të rihapjes, nëse do të vijojmë të kemi tregues të qëndrueshëm, sa i përket rasteve aktive ditore, numrit të shtruarve në spitale, pacientëve në terapi intensive, kemi planifikuar që prej datës 18 Maj:
Do të fillojë zhvillimi i procesit mësimor dhe provimeve të maturës shtetërore sipas udhëzimeve dhe protokolleve të miratuara nga Ministria e Shëndetësisë. Po në këtë datë planifikojmë të hapen njësitë e shërbimit, bare dhe restorante vetëm në ambientet e jashtme deri në orën 17:30.
Duke filluar nga data 18 Maj shtohen fluturimet e riatdhesimit, me detyrimin për vetëkarantinim në banesë. Prej datës 18 Maj planifikohet të hapen nën rregulla rigoroze, muzetë, galeritë e arteve dhe sitet arkeologjike sipas protokolleve dhe udhëzimeve të miratuara.
Nga data 18 Maj do të lejohen me protokolle dhe masa sigurie dhe stërvitjet individuale të sportistëve në ambiente të hapura. Do të vijojnë të jenë të ndaluara aktivitetet kulturore dhe sportive në ambientet e hapura dhe të mbyllura.
Po kështu do të vijojë të mbetet në fuqi ndalimi i grumbullimeve me shumë se pesë personave në ambientet publike si dhe do të mbetet i mbyllur dhe transporti publik”, tha ajo.
