Adnand Xhelili, prokuror në Prokurorinë e Tiranës është shkarkuar nga detyra për shkak të problemeve që ka haspur me justifikimin e pasurisë. Komisioni i Pavarur i Kualifikimit ka bërë të ditur vendimin sot, pas problemeve që prokurori ka pasur për justifikimin e një apartamenti në Tiranë dhe të një vile në Borsh.
Trupa gjykuese e KPK e drejtohej nga Olsi Komici, me relatore Firdes Shuli dhe anëtare Brunilda Bekteshi.
Relatorja Shuli shpjegoi se Xhelili e kishte blerë apartamentin si i pastrehë nga Enti i Banesave në vlerën 1.1 milionë lekë dhe e ka shlyer për periudhën 1999-2005. Komisioni konstatoi mospërputhje të burimit të deklaruar në vitin 2003 me atë në deklaratën vetting, pasi në të parën është shënuar kredia, ndërsa tek e dyta kursimet familjare.
Trupa gjykuese ka vlerësuar se Xhelili nuk e justifikon pasurinë dhe për këtë arsye ka dhënë vendimin për shkarkimin e tij. Nga ana tjetër, Xhelili në fund të procesit ka dorëzuar dokumente shtesë për të justifikuar pasurinë.
