Ish-kreu i Policisë Bashkiake të Tiranës, Florenc Hoxha, ka përfunduar në Spitalin Ushtarak. Pretendohet se ndaj Hoxhës mund të ketë vazhduar ushtrimi i dhunës edhe në ambientet ku mbahej i ndaluar.
Aktualisht Hoxha gjendet nën kujdesin e mjekëve. Burimet e Mapos nuk përjashtojnë mundësinë që ai të ketë pësuar një dëmtim të dorës, një problem shëndetësor që Hoxha e ka prej kohësh. Por raportohet se ish-oficeri i policisë ka marrë goditje edhe në kokë.
Protestuesit dje shkatërruan një prej simboleve të Edi Ramës, që është kërpudha tek Kryeministria.
Protagonisti kryesor i këtij aksioni mendohet se ka qenë Florenc Hoxha. Mendohet se kjo është arsyeja që ndaj Hoxhës është ushtruar dhunë.
Dhuna gjatë protestës së opozitës ka bërë që plot 80 persona të shoqërohen në polici, ndërsa të arrestuar janë 15 pjesëmarrës.
Numri i të ndaluarve pritet të rritet, pasi për ngjarjet e djeshme do të ketë të ndaluar edhe në rrethe, ku në identifikimin e shkelësve të ligjit janë përfshirë edhe Komisariatet e Qarqeve.
Ndalimi i tyre ka ardhur pas analizimit të pamjeve filmike, raporteve të shërbimeve policore dhe provave të mbledhura gjatë protestës së një dite më parë, ku pati akte të dukshme dhune.
