Ish-kreu i Aleancës Kuq e Zi, Kreshnik Spahiu, i ka quajtur çmenduri akuzat e protestuesve se babai i Klodian Rashës shiti gjakun e të birit. Ai shkon më tej teksa paralajmëron se pas tre muajsh, këta protestues do ta harrojnë Klodianin dhe do qajnë rezultatin e votimeve.
Statusi
“Çmenduria kapërceu kufijtë, kur protestuesit akuzuan prindërit e Klodian Rashës se ka shitur me para gjakun e të birit. Kjo fundosi kauzën fallco të protestës. Nuk u dhimbsej Klodiani aspak. Pas 3 muajsh do harrojnë Klodianin dhe do qajnë rezultatin e votimeve, ndërsa prindërit do vajtojnë gjithë jetë birin e tyre, jo partinë e protestuesve”, shkruan Kreshnik Spahiu.
“Vrasje me dashje” ka vendosur organi i akuzës për policin, i cili rrezikon deri në 20 vite burg. Ndërkohë më parë akuza që rëndonte mbi Nevaldo Hajdaraj ishte ajo e “tejkalimit të kushteve të vetëmbrojtjes” me anë të së cilës rrezikonte vetëm 7 vite burg. Fillimisht polici u akuzua për tejkalim të kushteve të vetëmbrojtjes, por pasi grupi hetimor u njoh me pamjet e kamerave të sigurisë dhe provat e tjera, njoftoi do të ketë ndryshim të veprës penale.
Prokuroria ka siguruar dhe ka sekuestruar pamjet filmike të subjekteve përreth vendit të ngjarjes, të cilat japin një tablo më të qartë të dinamikës së saj.
Sipas organit të akuzës, Nevaldo Hajdaraj ka shënjestruar drejt trupit të viktimës, ndërkohë që në dëshminë e tij tha se kishte shënjestruar këmbët. Në filmimet që ka siguruar Prokuroria, rezulton se polici e ka qëlluar 2 herë Rashën me armën e shërbimit teksa ky i fundit ishte duke u larguar me vrap në drejtim të rrugicës që të çon drejt banesës së tij.
