Princ Harry dhe gruaja e tij, Meghan Markle kanë habitur opinionin publik mbarë botëror, teksa kanë shprehur dëshirën për t’u tërhequr nga të qenurit anëtarë të Familjes Mbretërore.
Përmes një postimi në Instagram, Duka dhe Dukesha e Sussex shprehen se ata duan të punojnë për t’u bërë të pavarur financiarisht.
Ata shprehen se do ta ndajnë kohën e tyre mes Amerikës Veriore dhe Mbretërisë së Bashkuar. Kjo balancë sipas tyre, “do t’i ndihmojë ata të rrisin djalin e tyre me një vlerësim për traditën mbretërore ku ai lindi, duke i siguruar gjithashtu familjes tonë hapësirën për t’u përqendruar në kapitullin tjetër”.
Ata thonë se largimi do të ndodhë në çastin e duhur, teksa theksojnë se vijojnë të bashkëpunojnë me Familjen Mbretërore.
“Pas shumë muajsh reflektimi dhe diskutimesh të brendshme, ne kemi zgjedhur të bëjmë një ndryshim këtë vit, duke filluar të krijojmë një rol të ri progresiv brenda këtij institucioni. Ne synojmë të tërhiqemi si anëtarë të “vjetër” të Familjes Mbretërore dhe të punojmë për t’u bërë të pavarur financiarisht, teksa do vazhdojmë të mbështesim plotësisht Madhështinë e saj, Mbretëreshën. Falë inkurajimit tuaj gjatë viteve të fundit, ne ndjehemi të përgatitur për ta bërë këtë ndryshim. Ne tani po planifikojmë ta balancojmë kohën tonë mes Mbretërisë së Bashkuar dhe Amerikës së Veriut, teksa do vijojmë të respektojmë detyrën tonë ndaj Mbretëreshës, Komonuelthit dhe patronazheve tona. Ky ekuilibër gjeografik do të na mundësojë ta rrisim djalin tonë me një vlerësim për traditën mbretërore ku ai lindi, duke i siguruar gjithashtu familjes tonë hapësirën për t’u përqëndruar në kapitullin tjetër, përfshirë këtu edhe fillimin e entitetit tonë të ri të bamirësisë. Ne mezi presim të ndajmë detajet e plota të këtij hapi tjetër emocionues i cili do ndodhë në kohën e duhur, pasi vazhdojmë të bashkëpunojmë me Madhështinë e saj Mbretëreshën, Princin e Uellsit, Dukën e Kembrixhit dhe të gjitha palët përkatëse. Deri atëherë, ju lutemi pranoni falënderimet tona më të thella për mbështetjen tuaj të vazhdueshme”, shprehen ata.
