Emisioni “Stop” në Tv Klan pak muaj më parë ka trajtuar një histori të dhimbshme, dhe problematike. Bëhet fjalë për një aksident në punë, që një djali të ri të quajtur Donald Tufi, 20 vjeç i ka kushtuar gishtin e njërës dorë.
Në janar 2021 ai filloi punë pranë firmës së përpunimit të kartonëve për pica, pranë zonës “Ish-Fabrika e qelqit”, e quajtur CDK PACK sh.p.k me administrator shtetasin turk, Savas Karaca. Më 15 mars 2021, Donaldi pësoi një aksident të rëndë.
Në prani dhe me urdhër të përgjegjësit Dedë Bushpreni, ai detyrohet të futet poshtë makinerisë së ndezur për të pastruar bojën. Në këtë moment, makineria i dëmton Donaldit tre gishtat e dorës. Lajmërohet pronari dhe e drejtojnë për në qendrën më të afërt shëndetësore, duke i thënë se në spital ka polici dhe mund t’u krijoheshin probleme, ndaj duhet të deklaronte se ishte vrarë në shtëpi dhe jo në punë.
Në 23 mars 2021, Donaldit i vjen një njoftim për largim nga puna në datën 1 prill 2021, “për moszbatim me përpikmëri të rregullave të sigurisë në punë”. Pas interesimit të përsëritur të emisionit “Stop” Gjykata e Rrethit Tiranë, Dhoma Penale, shqyrtoi kërkesën tonë dhe të avokatit të viktimës, duke vendosur të shfuqizojë vendimin e ish-prokurorit Martini për mosfillimin e procedimit penal. Gjykata i është drejtuar prokurorisë, që të regjistrojë procedimin dhe i ka lënë detyrë, që të punojë për këtë rast./tvklan.al
