Të martën që vjen pritet të mblidhet grupi parlamentar i Partisë Socialiste. Pjesë e diskutimit të grupit pritet të jetë diskutimi dhe dorëzimi i emrave për Presidentin e Republikës. Kujtojmë se PS ka mandatuar Taulant Ballën, Elisa Spiropalin si dhe Damian Gjiknurin për diskutimet mbi zgjedhjen e Kreut të ri të Shtetit. Formula e propozuar nga PS për përzgjedhjen e kandidatëve do bëhet përmes një zarfi anonim, ku do të paraqiten 3 emra nga secili deputet socialist.
Procedura përcakton qartë se një grup prej tre deputetësh, kreu i grupit parlamentar socialist, Taulant Balla, Sekretari i Përgjithshëm i PS, Damian Gjiknuri si dhe Ministrja e Shtetit për Marrëdhëniet me Parlamentin, Elisa Spiropali, do të jenë ata që do të bëjnë përzgjedhjen e këtyre kandidatëve të sjellë nga deputetët. Në 24 korrik mbaron mandati i Presidentit Ilir Meta.
