Presidenti Meta priti sot në një vizitë shtetërore në Shqipëri, presidentin e Malit të Zi, Filip Vujanoviç.
Dy presidentët zhvilluan një takim të veçantë kokë më kokë e më pas kryesuan takimet e zgjeruara mes dy delegacioneve zyrtare. Në fund të dy presidentët dhanë një konferencë të përbashkët për shtyp dhe iu përgjigjën interesit të mediave.
Gjatë fjalës së tij, presidenti i Malit të Zi deklaroi se nuk ka asnjë çështje të hapur me Shqipërinë, gjë që e ripohoi edhe presidenti i Shqipërisë Ilir Meta.
“Nuk kemi pyetje të hapura për kufirin me Shqipërinë, është çështje teknike e marrëveshjes, nuk kemi asnjë çështje të hapur, kemi nevojë që t’i avancojmë”, tha Vujanoviç.
Sa i takon pyetjes për demarkacionin e Kosovës, presidenti i Malit të Zi, tha: Marrëveshja është e mbyllur, është nënshkruar në Vjenë, është ratifikuar në Malin e Zi, është çështje e brendshme e Kosovës, duhet të llogaritet për marrëdhëniet e Brukselit, e ka vënë kusht BE për vizat e Kosovës.
