Pas fitores ndaj Tiranës, ekipi i Kukësit është rikthyer në garën për titullin kampion. Përballë bardhebluve, trajneri Shpëtim Duro kishte më në fund në dispozicion grupin e plotë, duke treguar një epërsi në fushën e lojës, çka solli dhe rezultatin pozitiv për Kukësin.
Nga ana tjetër, kjo fitore ka bindur presidentin Gjici, se ekipi i tij është rikthyer me kohë të plotë në garën për titullin kampion. Ai ka kërkuar nga ekipi i tij të mos ndalen këtu dhe në ndeshjen e ardhshme të “sulmojnë” për kreun.
Në ndeshjen e radhës, Kukësi përballet me Teutën në “Elbasan Arena” ndërsa shpresojnë shumë që Tirana të ndal Partizanin në derbin e kryeqytetit.
Për të ngrohur lojtarët dhe stafin, përpara kësaj jave shumë përcaktuese, numri një i klubit ka njoftuar se brenda javës do shpërndahen edhe pagat.
