Policia e Durrësit ka vënë në pranga një 48-vjeçar, i cili fuste në kurth pronarët e karrotrecave për të mos paguar. Uniformat blu kanë zbardhur skemën se si ai ia dilte për të mos paguar, dhe të ikte në drejtim të paditur.
Burime zyrtare të policisë bëjnë me dije se ai i telefononte ata me pretekstin se makina e tij kishte pësuar dëmtime, dhe më pas u kërkonte para atyre për të paguar servisin duke u larguar me shpejtësi. Ky shtetas është vënë dje në pranga në Sukth të Durrësit, duke tentuar t’i marrë me anë të mashtrimit një tjetër pronari karrotreci, i cili kishte rënë në “kurthin” e tij.
Në cilësinë e provës materiale u sekuestrua automjeti tip “Benz” që ai e përdorte për t’u larguar pasi merrte paratë e përfituara, të cilin e kishte braktisur në Sukth, Durrës. Materialet i kaluan Prokurorisë së Rrethit Gjyqësor Durrës, për veprime të mëtejshme.
Ai rezulton se është autor i dyshuar i 5 vjedhjeve të ndodhura më parë, konkretisht:
Më datë 27.02.2021, me anë të mashtrimit i ka vjedhur shumën prej 600 euro, shtetasit E. Ç.;
Më datë 18.03.2021, me anë të mashtrimit i ka vjedhur shumën prej 65.000 lekë, shtetasit A. P.;
Më datë 18.04.2021, me anë të mashtrimit i ka vjedhur shumën 800 euro, shtetasit P. P.
Më datë 18.07.2021, me anë të mashtrimit i ka vjedhur shumën 700 euro, shtetasit A. G.;
Më datë 21.07.2021, me anë të mashtrimit i ka vjedhur shumën prej 500 euro, shtetasit S. M.
