Portugalia po përjeton një situatë të rënduar epidemiologjike, pasi 90% e të infektuarve me Covid-19, janë me variantin indian, Delta. Lajmi u bë me dije nga Instituti Kombëtar i Shëndetit në vend, Doutor Ricardo Jorge (INSA), shkruan Euractiv.
“Siç pritej, shifrat janë përkeqësuar në të gjitha rajonet në muajin e fundit, duke regjistruar një “rritje të fortë” në rajonin verior, ku përbën 71.1% të infeksioneve, 85.7% në Madeira dhe 64.7% në Azore”, tha instituti përmes një deklarate.
Ky shtim i rasteve erdhi si pasojë e hapjes së kufijve që solli edhe rritjen e numrit të turistëve. Nëse rritja vazhdon, shifra mund të dyfishohet nga mesi i korrikut, paralajmëroi Ministrja e Shëndetësisë Marta Temido në një intervistë për mediat vendase.
Portugalia kohët e fundit ka përshpejtuar fushatën e saj të vaksinimit për t’iu përgjigjur përhapjes së shpejtë të variantit Delta, me rreth 850,000 doza të administruara në javë, theksoi task forca përgjegjëse për koordinimin e logjistikës.
