Nga Anxhela Ferra
Zhvillimet e vrullshme urbane që kanë përfshirë Shqipërinë, veçanërisht kryeqytetin janë duke ndikuar negativisht në mjedis. Ekspertë të mjedisit konfirmojnë për Tirana Today se niveli i ndotjes në kryeqytet është rritur si pasojë e ndërtimeve, trafikut të mbingarkuar dhe mungesa e hapësirave të gjelbra. Ata thonë se në Tiranë niveli i ndotjes është 35% mbi normalen, ndërsa në zonat ku ndërtimet janë pa kriter këto shifra dyfishohen. Këtë gjë e konfirmon edhe ambjentalisti Sazan Guri, i cili në një intervistë për Tirana Today fajëson kryetarin e Bashkisë i cili sipas tij jep leje për ndërtim pa marr parasysh ambientin, por vetëm fitimet e veta klienteliste.
“Për mua ndotja më e madhe në kryeqytet është dendësia urbane. Kjo do të thotë që nëse kemi në një hektarë ku duhet të jetojnë maksimumi 150 veta, këtu jetojnë mbi 1000 veta . Kryetarët e Bashkive si ata që kanë qenë, por veçanërisht ky aktuali që do të marr një mandat të dytë, kanë bërë shumë gabime. Një mandat për ta mbytur Shqipërinë dhe shqiptarët. Tirana është gjysma e popullsisë dhe dendësia ku ai nuk ndërton drejt Paskuqanit, drejt Lumit të Tiranës që është pjesa bosh dhe atje mund të ndërtojë qyteza të reja. Por, kërkon të ndërtojë te Teatri, brenda Muzeut, pas Hotel Tirana, te Sahati, tek Rr. e Kavajës apo Durrësit.
Ky nuk ka lënë cep të gjelbër pa e kthyer në cep urban. Është një lek i drogës, i punëve të pista që jeton në ajër. Dhe këta duan ta zbresin me anë të ndërtimeve, blihet apo jo për ta nuk ka rëndësi. Sepse vetëm në Kashar janë 6 mijë apartamente pa shitur ende. Një pemë mbjell Veliaj, madje dhe ai që është më i djathti e i pavëmendshëm mendon se ky është duke punuar. Ai nuk po mbjell pemë, në fakt Veliaj është duke mbjell vdekjen e shqiptarëve. Ai ka frymë makabre, mashtrues, është doktor mortja.”
Kandidati për Bashkinë e Tiranës në vitin 2015, shton për Tirana Today se nuk mendon të kandidojë përsëri në zgjedhjet e ardhshme, pasi sipas tij nuk do të jetë pjesë e baltës.
“Absolutisht që nuk e mendoj të kandidoj përsëri. Pasi duke qenë të njëjtat rregulla, ku ai të vjedh sy për sy unë nuk mund të bëhem pjesë e baltës. Fitorja është e përcaktuar në njëfarë mënyre. Nëse jemi me këto ligje, fitojnë prapë këta që janë në qeveri.”
Guri thekson se edhe pse një ndërtues para se të nisë punimin duhet të marr edhe një leje mjedisore, kjo e fundit nuk ka fuqi të hedhë poshtë projektin nëse konstatohen probleme në ambient.
“E gjithë Tirana është duke vuajtur nga mbi ngarkesa e ndërtimeve. Se i ndërtojnë pallatet pa kriter, i zënë frymën njëri-tjetrit. Kështu nuk lejon as korridorin ekologjik natyror dhe je kundra ligjeve të natyrës. Nuk ndodh në botë që një raport mjedisor ta anulojë një projekt. Dhe leja e mjedisit vërteton që ai person është në rregull me dokumentet shtetërore. Një studim mjedisor që nuk bëhet fare është kur ato vijnë me urdhër nga kryeministri.
As nuk pyesin fare me rregulla, ato ikin si elefanti në rrjetat e merimangës. Ndërkohë një grup tjetër që jemi shumë pak, bëjmë studime mjedisore të pastra ne na nxihet jeta. Ky popull është trap, nuk kupton që mjedisi nuk bën dhe ç’bën asnjë projekt. Nuk ka atë detyrë, prandaj quhet raport mjedisor.”
Ndotja e mjedisit është duke kërcënuar edhe jetën e shumë qytetarëve. Kjo pasi sipas ekspertëve të mjedisit nuk bëhet fjalë vetëm për ndotjen e ajrit, por efektet ndjehen edhe në ujin apo ushqimet që konsumojnë. Duke qenë kështu një ‘vrasës i heshtur’ për gjithë shqiptarët. Guri ngre edhe problematikën e gazit lotsjellës të përdorur gjatë protestave. I cili sipas tij, është duke sjellë një dëm shumë të madh në mjedis.
“Shqipëria ka problem të madh me trajtimin e ujërave të zeza apo urbane. Me hedhjen e tymrave me ngjyrë në oxhaqet e teknologjive, sado e vogël qoftë ajo. Dhe gazi që po hedhin policët gjatë protestave si nuk ndikon në mjedis. Ai ishte gaz lufte që po e ndot ajrin. Dhe pastaj bie në tokë, ku e marrin ujërat nëntokësorë të cilët e shpërndajnë nëpër puset nëntokësore. Pak minuta pasi hidhet ajo ngarkesë nuk shkon dot lartë, pasi nuk ka fuqi dhe për shkak të rëndesës bie në tokë. Dhe nëse ndotet uji në strukturën kimike, nuk ka fabrikë ta pastrojë.”/TIRANA TODAY
