Sekretari amerikan i Shtetit, Mike Pompeo i ka kërkuar Albin Kurtit të heqë taksën ndaj Serbisë dhe të shfrytëzojë në maksimum momentin për normalizim të raporteve me Serbinë. Mësohet se Pompeo e ka përcjellë mesazhin me anë të një letre zyrtare drejtuar kryeministrit Kurti.
Sipas Sekretarit amerikan të Shtetit ka ardhur koha që Kosovës t’i hapen dyert për integrim të plotë ndërkombëtar.
“I uroj qytetarët e Kosovës për zgjedhjet e suksesshme dhe demokratike. Ne e mirëpresim formimin e Qeverisë së Kosovës dhe presim që të punojmë së bashku, që t’iu paraprijmë qëllimeve të përbashkëta në rritjen ekonomike, sundimin e ligjit dhe normalizimit të raporteve me Serbinë”, nis letra e sekretarit amerikan.
“Ne e mirëpresim zotimin tuaj për të luftuar korrupsionin derisa përpiqeni t’i përkrahni aspiratat e popullit të Kosovës, përfshirë dëshirën e tyre për transparencë më të madhe dhe mundësi ekonomike. Tani është koha ta kuptoni se normalizimi gjithëpërfshirës i raporteve me Serbinë, i fokusuar në njohjen e dyanshme është esencial për integrimin e plotë ndërkombëtar të Kosovës. Shtetet e Bashkuara do të ju qëndrojnë në krah, në përkrahje të këtij procesi.
Heqja e tarifës për produktet serbe dhe boshnjake do të ndihmonte që palët të ktheheshin në tavolinën e negociatave. Ne shpresojmë dhe presim që ky do të jetë prioriteti juaj dhe se do të shfrytëzoni momentumin e krijuar nga letrat që synojnë të vendosin lidhjen ajrore dhe hekurudhore mes Prishtinës e Beogradit.
Ne presim të punojmë ngushtë me Qeverinë tuaj të re që të sigurohemi për prosperitet të një Kosove multietnike e demokratike”, ka shkruar Pompeo.
