Pas akuzave për COVID-19, sekretari amerikan i shtetit, Mike Pompeo, dhe ish-strategu i Shtëpisë së Bardhë, Steve Bannon, kanë përfunduar në faqen e parë të ‘Daily China’. Kjo gazetë është zëri i Partisë Komuniste Kineze, e cila i konsideronte ata “një çift kllounësh gënjeshtarë”.
Tensionet mes SHBA-së dhe Kinës po shtohen dita-ditës. SHBA e ka akuzuar Kinën se ka fshehur dhe vonuar pandeminë e koronavirusit. Sipas Pekinit, argumenti amerikan se pandemia e ka origjinën nga një laborator në Wuhan, është i pabazuar.
Disa ditë më parë, televizioni shtetëror kinez CCTV, denoncoi në mënyrë të përsëritur Mike Pompeo-n, duke e quajtur atë “armikun e përbashkët të njerëzimit”. Po kështu hodhi akuza të rënda ndaj SHBA-së, për “përhapjen e një virusi politik” për pretendimet e saj të përsëritura se pandemia ka origjinën në një laborator kinez.
Organizata Botërore e Shëndetit (OBSH), ka deklaruar se nga SHBA nuk i është dërguar asnjë provë që do të vërtetonte se koronavirusi kishte dalë nga ndonjë laborator në Wuhan.
