Ish-kryeministri italian, Matteo Renzi, ka bërë publike planet e tij për t’u larguar nga Partia Demokratike (PD), dhe formimin i një grupimi të ri, në një lëvizje që mund të destabilizojë qeverinë e sapoformuar të koalicionit në Itali. Partia Demokratike e qendrës së majtë dhe Lëvizja 5 Yjet (M5S), dy ish-armiq të betuar, kanë bashkuar forcat duke vënë në opozitë liderin ekstremist të djathtë, Matteo Salvini.
Renzi njofton se do të krijojë një parti të re, sipas tij, për të bërë politikë në një mënyrë tjetër. “Tani është një çështje e ndërtimit të një shtëpie të re, inovative, feministe, ku lançohen ide dhe propozime për Italinë dhe Evropën tonë”, shkruan ai ndër të tjera në Facebook. Matteo Renzi citon më tej se ka një hapsirë për një politikë tjetër, e përbërë nga pasione dhe pjesëmarrje.
“Vendosa të largohem nga Partia Demokratike, dhe të krijoj një shtëpi të re së bashku me të tjerët, për të bërë politikë në një mënyrë tjetër. Pas shtatë vitesh zjarri miqësor, mendoj se duhet të kemi parasysh që vlerat, idetë tona, ëndrrat tona nuk mund të jenë objekt i argumenteve të brendshme çdo ditë.
Fitorja që morëm në Parlament kundër populizmit dhe Salvini, ishte e rëndësishme për të shpëtuar Italinë, por jo sa duhet. Tani është një çështje e ndërtimit të një shtëpie të re, inovative, feministe, ku lançohen ide dhe propozime për Italinë dhe Evropën tonë.
Ka një hapësirë të madhe për një politikë tjetër. Për një politikë jetese, të përbërë nga pasione dhe pjesëmarrje. Kjo hapësirë pret vetëm angazhimin tonë. Unë ua lë polemikën dhe komplotin atyre që ndodhen në pallate. Unë buzëqesh me të gjithë dhe uroj kthim të mirë për ata që do të kthehen tani në Partinë Demokratike.
Dhe fat të mirë për ata që mbeten atje. Për mua ka një mënyrë të re për të shkuar. Ne do ta bëjmë atë, hap pas hapi. Politika kërkon propozime dhe guxim, jo vetëm lojëra aktuale. Ne jemi atje. Ne u ofrojmë entuziazmin tonë atyre që na japin dorën.
Ne ofrojmë respektin tonë për ata që do të na kritikojnë. Por mbi të gjitha, do të ofrojmë ide dhe ëndrra për Italinë e së nesërmes. Shihemi tek Leopolda”, shkruan Renzi.
Mediat italiane raportojnë se 30 deputetë mund të largohen nga Partia Demokratike, duke ruajtur besnikërinë e tyre ndaj Renzit.
