Drejtoria e Policisë ka refuzuar kërkesën e Partisë Demokratike, për të protestuar para Parlamentit më datën 5 Mars, në orën 09:00. Policia e Shtetit ka renditur disa nga pikat kryesore pse ka ndërmarë një vendim të tillë, duke e nisur nga; dhuna e ushtruar ndaj anëtarëve të Parlamentit, dhuna ndaj punonjësve të policisë, duke përdorur edhe mjete të forta, thirrjet me përmbajtje dhune nga ana e organizatorëve.
“Kërkesa juaj për tubim para Parlamentit cënon sigurinë e Institucionit me Rëndësi të Veçantë, siç është Kuvendi i Shqipërisë, pengon hyrjen në të të deputetëve, administratës dhe punonjësve të tjerë, vë në rrezik jetën e tyre dhe pengon zhvillimin e punimeve të parashikuara për në orën 10:00 të kësaj date, ndaj ndalohet zhvillimi i tubimit tuaj në vendin që keni kërkuar”, thuhet në letrën e policisë.
Po kështu, Policia e Shtetit fton opozitën që të protestojë paqësisht në një tjetër hapësirë, ndërsa kujton se në rast të shkeljes së vendimit të saj, organizatorët do të mbajnë përgjegjësi administrative dhe penale.
