Dy aktorë meksikanë kanë ndërruar jetë, teksa po xhironin një pjesë të serialit ku ata ishin pjesë.
Rrjeti meksikan Televisa njoftoi se Jorge Navarro Sánchez dhe Luis Gerardo Rivera ndërruan jetë ditën e enjte, teksa po bënin prova për një skenë.
Ata kanë rënë aksidentalisht nga një urë. Produksioni i serialit po punon me autoritetet për të zbardhur dinamikën e plotë të këtij aksidenti por detaje të tjera nuk u bënë publike.
“Lutjet tona janë me familjet e Jorge dhe Luis Gerardo, të cilëve ne i dërgojmë ngushëllimet tona”, thuhet në deklaratën e Televisa.
Navarro Sánchez dhe Rivera ishin duke xhiruar sezonin e tretë të “Sin Miedo a la Verdad” (Pa frikë nga e vërteta). Seriali, i cili filloi transmetimin në vitin 2018 tregon historinë e një hakeri të ri, teksa ai ndihmon viktimat e krimit, sulmit në internet dhe korrupsionit.
Përveç rolit të tij në shfaqjen e Televisa, Navarro Sánchez së fundmi u shfaq në “Monarca” të Netflix. Ndërsa Rivera ishte pjesë e kastit të serialit televiziv të Telemundo “El Señor de los Cielos”.
