“Gabimet e inxhinierëve në zbatim dhe projeksion, dalin gjatë tërmeteve”. Këtë e ka pohuar profesoresha e ndërtimit, Luljeta Bozo. Në një lidhje telefonike për ‘News24’, ajo deklaroi se shembjet e pallateve dhe ndërtesave në Durrës, nxjerrin në pah problemet me planimetritë inxhinierike. Ajo ka deklaruar se qyteti i Durrësit gati është ‘zhdukur’ tërësisht nga 3 tërmetet që e kanë goditur përgjatë viteve. Specialistja ndër të tjera jep alarmin se në këtë qytet, është ndërtuar pranë vijës bregdetare, dhe bazamentet në këtë zonë janë problematike.
“Kur këto godina janë shumë afër, bëhet fjalë për plazhin e Durrësit, bazamentet janë problematike. Është për t’u dhënë alarmi se si ka ndodhur kjo. Në plazhin e Durrësit ka një problem, ndaj nuk është ndërtuar për vite me radhe. Durrësi është shkatërruar 3 herë nga tërmetet, është groposur. Në rast të lëkundjeve sizmike, ato prishin strukturën. Toka nuk reagon njësoj”, theksoi ajo.
Profesoresha e ndërtimit u shpreh se gjërat do të ishin më ndryshe, nëse ndërtimet do ishin bërë me rregulla. Ajo sjell në fokus ndërtimet deri tek 20 katëshi, gati në breg të detit. Sipas saj, edhe nëse ne kemi bazë të fortë, mund të ndodh gërryerja e themeleve pas ca viteve.
“Godinë që pati këtë problem, ku dheu u kthye në llum, ajo nuk u zhyt, por u palos (në Kënetë). Ndoshta kjo gjë ka ndodhur edhe në këto raste, por s’mund ta them me siguri. Duhej të bëheshin analiza të dheut, nëse aty mund të ndërtohej apo jo.
Ky studim është bërë nga studiues tanët shumë të mirë para viteve ‘90. Sipas ndarjes tektonike, Durrësi ka qenë problematik. Nëse themelet janë të shëndetshme, strukturat punohen fare normale.
Gabimet e inxhinierëve në zbatim dhe projeksion, dalin gjatë tërmeteve. Nëse bëhen ndërtimet me rregulla shumë të qartë, gjerat do ishin ndryshe. Kemi ikur nga 6-katëshi, dhe kemi ndërtuar tek 8-10-20 katëshi gati në breg të detit.
Ky është një problem në projektim. Edhe nëse ne kemi bazë të fortë, mund të ndodh gërryerja e themeleve pas ca viteve. Mendoj se këto raste janë gabime në projektim dhe zbatim”, pohoi ajo.
Po ashtu, specialistja e ndërtimeve dha edhe një mesazh të qartë për popullatën, në mënyrë të tillë që kjo e fundit mos të alarmohet nga tërmetet. Sipas saj, nuk ka pse të ketë panik, sepse tërmetet do të jenë prezent gjithmonë.
“Tërmeti i 21 shtatorit, nëse ka dhënë një goditje të parë tek banesat, nëse ka pasur plasaritje, me një tjetër të dobët mund të ishin rrëzuar. Detyra e organeve shtetërore duhet të bëjë klasifikimin e dëmeve, që të parandalohet situata. Nuk ka pse të ketë panik, sepse tërmete do kemi gjithmonë, pasi këtu jetojmë. Ne jemi në brezin që do të kemi tërmete, duam s’duam ne. Njëherë në kaq kohë do ta ndjejmë një tërmet mbi kurrizin tonë. Duhet të kemi objekte sa më të qëndrueshme”, përfundoi ajo.
