Po mbahet ditën e sotme mbledhja e dytë e Komitetit Kombëtar për rindërtimin e banesave për banorët e prekur nga tërmeti.
Gjatë fjalës së tij, Rama tha se raporti i parë paraprak për dëmet do të jepet më 16 dhjetor. Ndërsa raporti final pritet që të dalë në fund të janarit të 2020 për të shkuar në konferencën e donatorëve.
“Nuk ka ende nuk raport paraprak të dëmeve përfundimtare. Një grup me ne Bankën Botërore dhe OKB është duke punuar, në 16 dhjetor synohet të dalë raporti i parë paraprak. Do të ketë një raport paraprak, një të dytë dhe një final në fund të muajit janar për t’i hapur rrugë konferencës së donatorëve”, tha ai.
Më tej në fjalën e tij, Rama deklaroi se qeveria e ka gati draftin e ligjit special të rindërtimit. Ai shtoi se po përgatitet edhe aplikacioni për transparencën.
“Po punojmë për një aplikacion për transparencën dhe besoj që në mbledhjen e ardhshme pas një jave do të prezantojmë. Kur të mblidhet komiteti do të prezantojmë. Këtu ka disa shpjegime për aplikacionin. Po përgatitet ligji special për rindërtimin për të krijuar një kuadër ekskluziv për të gjitha aspektet që kanë të bëjnë me rindërtimin. Një draft të parë e kemi gati, po bashkëpunojmë me komisionin e ligjeve për ta çuar drejt miratimit. Këtu kemi se çfarë përfshin; banesa të reja, për rindërtim, rindërtimi i të shemburave, rimëkëmbja ekonomike, banesat nga donatorët. Kemi 386 dosje projektesh për rindërtim. Dosje për fondacionet dhe donatorët për të shkuar në mënyrë të organizuar”, deklaroi ai.
