Zhdukja e 19-vjeçares shqiptare Artemis Vasili që jeton në Greqi, vijon të ngelet mister i pazgjidhur. Me 16 tetor 2020, e reja kishte dalë nga shtëpia, duke u thënë prindërve se po shkonte për të dhënë një intervistë pune.
Që pas asaj dite, vajza nuk është kthyer më në shtëpi, duke i humbur kontaktet me familjen. Një kufomë e gjetur në një valixhe, frikësoi familjen Vasili, se mund të ishte vajza e tyre e humbur. Por ekspertiza nxori që trupi i gjetur ishte i një gruaje 38 vjeçare.
Së fundmi avokati i familjes ka thënë se ka informacione se 19-vjeçarja po mbahet nga dy burra pa dëshirën e saj, dhe që mund të kenë ndryshuar pamjen e vajzës.
“Informacioni që kemi është se ajo po mbahet nga dy burra kundër vullnetit të saj. Në fakt, ata e kanë parë atë në Volos dhe Athinë, është saktësisht e njëjta dëshmi.
Pas dimensionit që ka marrë çështja, mendoj se mund të ketë pasur disa ndryshime në pamjen e 19-vjeçares, mund t’i kenë prerë flokët, mund t’i kenë vendosur paruke, nuk e di.
Hetimet janë duke vazhduar dhe apeli ynë është që kushdo që di gjë, të flasë edhe në mënyrë anonime”, u shpreh avokati.
