Ish-ministri i Drejtësisë, Ylli Manjani, ka shënjestruar një pjesë e qytetarëve, që sipas tij, u kërkojnë hesap të tjerëve, por vetë nuk bëjnë asnjë punë. Ky reagim vjen pas situatës kaotike që ndodhi dje tek Teatri, ndërsa artistët e qytetarët tërhiqnin turmën nga pas për të hyrë brenda ambienteve. Policia e kishte blinduar vendin.
Artistë e përfaqësues të shoqërisë civile kanë bërë rezistencë duke hyrë në ambientet e brendshme, kundër boshatisjes së nisur prej ditësh në kuadër të projektit për ndërtimin e Teatrit të ri mbi rrënojat e të vjetrit. Kreu i PD-së iu bashkua qytetarëve e aktorëve të cilët ndodheshin te Teatri Kombëtar, duke protestuar kundër shembjes së tij.
Po siç duket, Manjani nuk i ka mirëpritur aspak komentet negative të qytetarëve, te cilët nuk janë me shpresë se diçka do të bëhet nga ana e opozitës. Mjaft i irrituar nga kjo situatë, ai është i mendimit se qytetarët nuk duhet të presin nga Basha, por të reagojnë ndaj Ramës, pasi për të, ai është autori i këtij problemi.
Statusi
Edhe kjo ska bythë ku të rrijë!
Nga plazhi, nga hoteli luksoz me ajër të freskët, duke pushuar apo duke fryrë bulçinjtë me pifaf me fruta deti kërkojnë hesap:
“Po ky Basha çfarë bën?! Pse spo na e mbron teatrin”?!
“Po këta aktorët? Kot fare janë”!
Kulmi!!!
Dhe ç’është më e keqja. Basha shfaqet tek Teatri, hyn brenda në teatër pasi detyron policinë të tërhiqet dhe prap ky takëm njerëzish thonë:
“S’bohet kështu opozita”. “Tani i kujtu ky”?!
Mazallah t’u shkojë mendja të thonë ndonjë fjalë për autorin e problemit, Ed Ramën.
Se nuk pretendoj t’u shkojë mendja që teatri është i tyre, i yni dhe jo i aktorëve e as i opozitës!
As pretendoj që të kuptojnë që politika s’mund të jetë teatër i pozitës e opozitës.
Por të paktën mos kërkojnë hesap të tjerëve për punët që duhet të bëjnë vetë!
