Kryeministri në detyrë i Kosovës, Ramush Haradinaj, ka folur sërish rreth çështjes së mini-Shengenit Ballkanik.
Gjatë fjalës së tij në pritjen e organizuar për festat e fundvitit, Haradinaj tha se vendet e Ballkanit po mashtrojnë veten me këtë ide. Sipas tij, përfitimet që thuhet se do sjellë ky projekt për liri të lëvizjes, të njerëzve, mallrave dhe kapitaleve janë vetëm mashtrime.
“Tentimet për Minishengen dhe reciprocitet bëhen për të hequr taksën dhe nënshtruar Kosovën. Orientimi i Kosovës është drejt BE-së e jo drejt izolimit rajonal. Drejt NATO-s e jo Rusisë”, tha ai.
Kujtojmë se gjatë mbledhjes së tretë që u zhvillua 2 ditë më parë në Tiranë, pati edhe debate mes Haradinajt dhe Ramës. Debati lindi për shkak të refuzimit të ftesës nga Kosova për të qenë e pranishme në mbledhje.
Rama e kritikoi vendimin e Kosovës gjatë konferencës, duke sjellë reagime të shumta nga pala tjetër.
