Një ditë më parë, opozita zhvilloi protestën e nëntë kombëtare, e cila u mbajt për dy orë. Sikundër i dhanë shenjat e para, pas presionit ndërkombëtar, PD-LSI u distancuan nga çdo akt i dhunshëm.
Ndryshe nga sa ishim hasur nga protestat e tjera të zhvilluara më herët, mbrëmjen e djeshme nuk u sulmua asnjë institucion me gurë apo bombola molotov. Një tjetër detaj që tregoi që opozita u tërhoq nga dhuna, ishte dhe prania e shumtë e femrave dhe fëmijëve, ndryshe nga sa ka ndodhur herët e tjera.
Ishte vetë kryedemokrati, ai i cili bëri thirrje dy ditë më parë se do të ishte protestë paqësore, dhe se vetë ai do të merrte bashkëshorten dhe vajzat e tij. I vetmi detaj, i cili ngjasonte me atë të protestave të tjera ishte kur protestuesit ndezën dritat e celularëve të tyre, për të dhënë mesazhin e shpresës para se të niseshin drejt godinës ku mbahen seancat parlamentare.
Për herë të parë pas kaq kohësh, u ravijëzua hapur dhe një konflikt mes opozitës, pasi Monika Kryemadhi deklaroi se dënonte djegien e KZAZ-ve, dhe se ishte kundër veprimeve të tilla.
“Dënoj dhe distanohem nga të gjitha incidentet që kanë ndodhur në KZAZ-të. Çdo mjet që digjet, është i paguar me paratë e taksapaguesve shqiptarë. Çdo institucion që dhunohet, paguhet nga paratë e taksapaguesve shqiptarë. Edi Rama nuk nxjerr asnjë qindarkë nga xhepi i tij. Për çdo gjë që ne shkatërrojmë dhe nxjerrim inatin në të, e paguajmë përsëri ne me taksat tona”, tha ajo.
