Të dielën në mbrëmje, në zonën e njohur si Allias në Tiranë, Petrit dhe Afërdita Laze u plagosën nga dy persona teksa ndodheshin brenda banesës së tyre. Autorët hynë në banesë për të grabitur dhe pas përballjes me familjarët, qëlluan me armë. Çifti me origjinë nga Skrapari, prej 1994 ishin zhvendosur në Tiranë ku kishin hapur biznesin e tyre.
Detaje të reja janë zbardhur nga plagosja e çiftit. Për këtë ngjarje ende nuk ka asnjë të arrestuar, por dy të dyshuar, që janë shpallur në kërkim.
I dyshuari i parë është një fqinj i tyre, një banor i zonës në Allias me precedent penal, i cili gjatë kontrollit të policisë, nuk është gjetur në banesë. Ndërsa i dyti është i afërm i familjes Laze.
Për këtë të fundit dyshohet se mund të ketë qenë pjesë e grupit që tentuan grabitjen, pasi njihej me njërin nga punëtorët që çifti i biznesmenëve e kishte marrë në dyqanet e bukës. Ende nuk dihen identitetet e personave të shpallur në kërkim.
