Detaje tronditëse kanë dalë në dritë lidhur me plagosjen e një infermiereje në Greqi, dhe më pas vetëvrasjen e një shqiptari. Bashkëshortja e shqiptarit që i dha fund jetës, në një intervistë për shtypin grek, tha se i ndjeri mendonte se ishte operuar gabim dhe ishte revoltuar me stafin e spitalit.
Shqiptari kishte thërritur për ndihmë infermieren, dhe po e priste pas dere. Sapo kishte hyrë në dhomë, e kishte goditur me thikë dhe me grushte. Më pas është ngjitur në katin e pestë të spitalit, dhe është hedhur duke u vetëvrarë. Ndërsa infermierja 32-vjeçare ka mbetur e plagosur me dëmtime të rënda, por jo në rrezik për jetën.
59-vjeçari shqiptar, identiteti i të cilit nuk është bërë i ditur, ishte diagnostikuar me kancer në mushkëri në muajin mars të vitit të kaluar, dhe më 19 gusht të këtij viti iu nënshtrua një operacioni.
Duke folur për të përditshmen “Kathimerini”, gruaja e 59-vjeçarit ka sqaruar se burri i saj nuk vuante nga probleme të shëndetit mendor, sikurse dyshoi policia greke. Por ditët e fundit, ai mendonte se i ishte nënshtruar padrejtësisht operacionit.
