Sekretari i Përgjithshëm i Partisë së Lirisë, Tedi Blushi, ka denoncuar Ministrin e Mbrojtjes, Niko Peleshi, për të ashtëquajturin “skandali i tenderit 600 mijë euro”. Ai pretendon se ky tender me shifrën 600 mijë euro po shpërdohet për 8 vajza “hostess”. Tedi Blushi sqaron me anë të një postimi në rrjetet sociale se janë duke u shpërdoruar taksat e shqiptarëve, në kulmin e krizës ekonomike. Duke e cilësuar si një tender të turpshëm, Tedi Blushi kërkon që të anulohet menjëherë, e ndërsa vlera e saj është e barabartë me pagën e 575 pedagogëve.
“Thellohet skandali i tenderit 600 mijë euro të Ministrit Peleshi: Do paguajmë 8 vajza hostess që ofrojnë “shërbime çlodhjeje” për tre orë.
Shpërdorimi i taksave të shqiptarëve, në kulmin e krizës ekonomike, po arrin nivele abuzimi të paimagjinueshme.
Të tjera fakte skandaloze zbulohen nga tenderi që denoncuam pak kohë më parë, i Ministrisë së Mbrojtjes, që ka vendosur të shpenzojë 600 mijë euro për “shërbime çlodhjeje”.
Referuar dokumentave të këtij prokurimi të turpshëm mësohet se me këtë fond të majmë, Niko Peleshi do paguajë edhe 8 vajza hostess me uniformë, për një shërbim 3 orësh (dokumenti bashkëlidhur) në ahengun e “tallavasë” që do të organizojë Ministria e Mbrojtjes, në funksion të të cilit do të blihen edhe 700 tapete e mokete.
Ky tender i turpshëm, simbol i babëzisë, vlera e të cilit është e barabartë me pagën e 575 pedagogëve që prej muajsh janë në protestë për një rrogë dinjitoze, duhet anuluar urgjentisht, veçanërisht në kushtet kur shqiptarët po luftojnë sot për bukën e gojës! Është më shumë se një krim i shëmtuar!”.
