Presidenti i Shteteve të Bashkuara, Donald Trump, ka lënë të hapur mundësinë për një takim të mundshëm me Vladimir Putinin në Budapest, ndërsa priti në Shtëpinë e Bardhë kryeministrin hungarez Viktor Orban.
I pyetur nga gazetarët nëse planifikon të takohet me presidentin rus në kryeqytetin e Hungarisë, Trump u përgjigj shkurt:
“Gjithmonë ka një shans.”
Kryeministri hungarez mbërriti në Shtëpinë e Bardhë të premten pasdite dhe u prit nga Trump jashtë Krahut Perëndimor, përpara se të hynin së bashku në Sallën e Kabinetit për bisedime zyrtare.
Burime nga Shtëpia e Bardhë bëjnë me dije se diskutimet do të përqendrohen në marrëdhëniet dypalëshe, situatën në Ukrainë dhe çështjet energjetike, ku nafta ruse mbetet pika kryesore e mospërputhjeve mes aleatëve.
Trump dhe Putin do të takoheshin në Hungari pas një telefonate që zhvilluan muajin e kaluar, por presidenti amerikan anuloi takimin, për shkak të dyshimeve se takimi nuk do të sillte përparim në një marrëveshje paqeje për Ukrainën.
Qeveria hungareze ka mbajtur marrëdhënie të afërta me Moskën gjatë luftës, duke e bërë Hungarinë një nga vendet e pakta të BE-së që mban një qasje të moderuar ndaj Rusisë, çka pritet të jetë pjesë e diskutimeve midis Orbanit dhe Trumpit në Uashington.
