Ish-opinionisti i “Big Brother VIP”, Arbër Hajdari, ka folur për eksperiencën e tij në spektaklin më të ndjekur, kur ishte i ftuar në emisionin “Wake Up”. Ndonëse “Big Brother” ka përfunduar, njerëzit nuk ndalen me komentet por edhe me kritikat. Madje ai ndau me publikun dhe rastet kur fansat e “Big-ut” kanë patur kritika për opinionin që ka dhënë gjatë spektaklit.
“Akoma ka shumë njerëz që vazhdojnë edhe pyesin për programin. Pyesin për ish-banorët. Të gjithë kanë diçka për të thënë. Të gjithë kanë mënyrat e tyre për të pyetur.
Kjo më ka ndodhur jo më larg se para një jave në SHBA, ku shkova për disa projekte sociale që ne po bëjmë. Në një nga takimet, ishte një pyetje për programin; Pse mendove kështu këtë gjë? A nuk do ishte më mirë ta thoje kështu? Unë ju përgjigja që programi ka mbaruar. Kam kuptuar që programi ka pasur një audiencë të jashtëzakonshme. Një gjithëpërfshirje të gjithë brezave. Në një mbrëmje që ishim, më erdhi një i moshuar dhe më tha: vetëm prej teje e kam parë. Këtu e kam kuptuar që programi ka kapur të gjitha grupmoshat”.
Sikundër i moshuari që ka pëlqyer modelin e Arbrit si opinionist, ky i fundit ka disa personazhe të cilët i mendon si emra të mundshëm brenda shtëpisë së “Big Brother”. Ai tha se do intrigoheshe nga disa personazhe si Agron Llakaj, Ermal Mamaqi, Xhemi Shehu, Salsano Rrapi. Për të, këta persozhe janë interesantë dhe kanë potencial.
Padiskutim që me interes është edhe nëse Arbri do të jetë sërish në rolin e opinionistit në “Big Brother VIP 2”. Ai u shpreh se ka shumë dëshirë, por angazhimet janë të shumta dhe nuk mund të ketë një përgjigje të saktë për këtë.
“Është një përgjigje shumë e vështirë, për shkak të angazhimit të madh që kam, nuk e di! Bigu ishte një eksperiencë shumë e bukur për mua. Në raport të dobisë në tërësi të asaj që kërkoj, mendoj që kam dëshirë por e shoh shumë të vështirë për t’u realizuar”.
Përpos angazhimit me “Big Brother”, është edhe “Fundjavë Ndryshe”. Gjatë periudhës 7-vjeçare, Arbri ia ka dedikuar kohën punës humanitare.
“Fundjava është gati 7 vjeç si aktivitet. Pjesën më të madhe të kohës ia kam dedikuar Fundjavës. Dhe jemi duke realizuar disa projekte njëkohësisht, dhe një ndër to është edhe projekti social më i madh në Ballkan, projekti i Qendrës së Solidaritetit e cila do të përmirësojë dhe do të na bëhet krahë për t’i shërbyer sistemit për nxjerrjen e njërëzve nga varfëria ekstreme dhe ka realizuar e suksesshme skema e nxjerrjes së shqiptarëve nga varfëria”, u shpreh themeluesi i “Fundjavës Ndryshe”, Arbër Hajdari.
