Në një periudhë pandemie në të cilën po jetojmë, ku ka kufizime ngado për të mbrojtur popullatën, duket se shpresa e vetme është tek vaksina. Por mjeku Pëllumb Pipero këshilon qytetarët se çdo gjë varet nga ne, dhe se nuk mund të pritet maksimalja nga një vaksinë.
Numri i të infektuarve çdo ditë e më shumë po njeh rritje në vend, po kështu edhe pacientët të cilët nuk ia dalin dot mbanë me këtë betejë. Në një intervistë në ‘Syri Tv’, Pipero tha se nuk pret ndonjë mrekulli nga vaksina. Dhe ajo çfarë është më e rëndësishme, duhet të shikojmë sa efikase do të jetë për imunitetin.
“Ajo që dua të theksoj në këtë situatë, është që secili nga ne por dhe nga bizneset duhet të sakrifikojnë nga pak për të ruajtur shëndetin e popullatës.
Muzika nuk vret, muzika shëron. Por virusi nuk ka fasho orare, ai qarkullon me ne.
Unë kam parë që lokalet e natës janë të tejmbushuara, dhe është e pamundur të përdoret maska apo të mbahet distanca fizike.
Vendime që kanë të bëjnë me gjoba, si masë ekstreme janë të dhimbshme, por janë të nevojshme për kufizimin e përhapjes së pandemisë.
Të rinjtë janë më të ekspozuar, po për fat të mirë preken me pak se të tjerët. Virusi nuk ka këmbë vetë të shkojë në shtëpi, por shkon nëpërmjet nesh.
Për mua, nuk është se presim ndonjë mrekulli me ardhjen e vaksinës.
E para duhet të presim të prodhohet. Ku unë mendoj se nga fundi i vitit mund ta kemi.
E dyta, duhet të presim të na vijë radha.
Dhe e treta duhet të shikojmë sa efikase do të jetë për imunitetin.
Mrekullinë e presim nga informacioni që duhet tu japim njerëzve për situatën.
Mrekullinë e presim nga kujdesi për t’u mbrojtur sa më mirë, dhe duke respektuar distancën. Vaksina është e mirëpritur, por nuk pres ndonjë mrekulli të veçantë”, tha ai.
