Dy ditë më parë, qeveria bëri me dije se hapja e klubeve të natës, diskove, bareve dhe shërbimeve të ngjashme është rreptësisht e ndaluar, ashtu si dhe muzika pas orës 20:00. Mjeku infeksionist Pëllumb Pipero është shprehur ‘kundër’ qeverisë, ku sipas tij, virusi nuk ka fasha orari.
I ftuar në “Ora News”, mjeku Pëllumb Pipero tha se Covid-19 nuk ka orar dhe lëviz çdo moment me ne. Sipas tij, të rinjtë nuk e kanë kuptuar që janë transmetues të heshtur, pasi nuk sëmuren kur infektohen, por e transmetojnë virusin.
“Virusi lëviz me ne, sa kohë lëvizim në 7 ditët e javës, virusi do të lëvizë me ne. Virusi nuk ka fasha orari. Unë besoj se ndalimi i funksionimeve të klubeve të natës dhe muzikës, nuk është qëllim në vetvete. Por ka për objektiv frenimin e qarkullimin e virusit mes të rinjve që frekuentojnë lokalet e natës.
Muzika njëlloj si dielli, si ajri, apo mjedisi i hapur shëron. Problemi është se të rinjtë nuk e kanë kuptuar që janë transmetues të heshtur, pasi nuk sëmuren kur infektohen, por e transmetojnë virusin.
Të gjitha lokalet dhe baret, si ditën ashtu edhe natën, duhet të respektojnë protokollet e sigurisë. Klubi i natës është për argëtim. Nuk mund të kërcejmë 2 metra larg njëri-tjetrit. Kjo është e dobishme për të frenuar përhapjen e virusit”, tha më tej ai.
